موضوع: مش عارفة تعملى ايه فى شغل البيت ؟ تعالى اقولك الأربعاء فبراير 08, 2012 2:30 am
السلام عليكم انا النهارده جايه اقولكم على شوية افكار علشان تفيد البنات اللى لسه متجوزين جديد وشغل البيت تقيل عليهم وده طبعا نتيجه ان ماما كانت مدلعاهم وبتجيب لهم الفطار فالسرير
اول شىء لازم تستعينى بالله سبحانه وتعالى وتطلبى منه انه يهون عليكى شغل البيت والطبخ وكده
روى أن فاطمة عليها السلام شكت ما تلقى في يدها من الرحى ، فأتت النبي صلى الله عليه وسلم تسأله خادما فلم تجده ، فذكرت ذلك لعائشة ، فلما جاء أخبرته ، قال : فجاءنا وقد أخذنا مضاجعنا ، فذهبت أقوم ، فقال : ( مكانك ) . فجلس بيننا حتى وجدت برد قدميه على صدري ، فقال : ( ألا أدلكما على ما هو خير لكما من خادم ؟ إذا أويتما إلى فراشكما ، أو أخذتما مضاجعكما ، فكبرا ثلاثا وثلاثين ، وسبحا ثلاثا وثلاثين ، واحمدا ثلاثا وثلاثين ، فهذا خير لكما من خادم ) . وعن شعبة عن خالد عن ابن سيرين قال : التسبيح أربع وثلاثون .
وبعدين تاخدى المكنسه الكهربا وتمشى بيها ف البيت كله اول يوم ممكن الشقه تاخد منك ساعه تانى يوم هتاخد اقل وهكذا لحد ما هتلاقى نفسك بتكنسى البيت كله ف 10 دقايق
بعد كده تدخلى المطبخ تشوفى هتطبخى ايه تجهزى طبيخك وتحطيه ع النار وتغسلى كل حاجه استعملتيها علشان الحوض ميتكومش ويسد نفسك
تخرجى من المطبخ وتاخدى قماشه نضيفه ( خرقه يعنى) وتدخلى ع الاوضه تمشى بالخرقه على الدولاب والسرير والسراحه وع الاوضه التانيه والتليفزيون والكمبيوتر وعلى الصالون والسفره وطبعا تشيلى التراب اللى على زجاج الشبابيك وخدى بالك لما تشيلى التراب كل يوم من ع العفش اولا العفش هيفضل جديد وثانيا التراب مش هيكوم ويتعبك ف شيله
متنسيش كل فرض يأذن تجرى وتسيبى اللى ف ايدك وتصلى الفرض علشان ربنا يباركلك ف الوقت
وبعدين يا سيتى بالنسبه للحمام هاتى طبق بلاستك من اللى بتغسلى فيه الفاكهه وده تخصصيه للحمام وتحطى فيه ليفه وتمليه ميه بشويه بريل او جنرال او فيرى ومعاهم نقطة ديتول او فنيك وتاخدى الطبق ده وتحطيه على رف الحوض اللى بتحطى عليه فرش السنان وكل ما تخشى تتوضى او تعملى حمام تقومى واخده الليفه مثلا دخلتى تتوضى للضهر قبل ما تتوضى تاخدى الليفه وتدعكى الحوض دخلتى تتوضى للعصر تاخدى الليفه وتدعكى التواليت
وبعدين تروحى تدخلى المخدات والملايه من البلكونه وتفرشى السرير
خلاص كده الحمد لله البيت اتكنس والموبيليا اتمسحت والحمام نضف والطبيخ خلص تاخدى بقى اى رشاش عندك فاضى بتاع الجلانس مثلا وتحطى فيه شوية داونى بتاع الغسيل وتحطى عليه ميه وترجيه كويس
وتدخلى على اوضة النوم وترشى رشتين ف الهوا وترشى رشتين على ملاية السرير وتقفلى الاوضه وتسيبيها
انتى ممكن تشوفى كل دى حاجات كتير وهتاخد منك وقت كتير هقولك اوك هتحسى بكده ف الاول بس لكن لما تعملى الكلام ده كل يوم هيبقى بالنسبالك عادى خالص وكل ده مش هياخد معاكى ساعتين الروتين الاسبوعى
بقى تخليه يوم الخميس ده طبعا هتعملى فيه اللى بتعمليه كل يوم لكن الزياده بقى
ملايات السرير تتغير وبعد ما تغيريها ترشى عليها رشتين من الداونى او اى معطر عندك
وقبل ما تكنسى تتنى المراتب وتمسحى تحتها وتسيبى الشباك مفتوح علشان يهوى وتبصى بصه ع الحيطه كده لو فيها تراب او عنكبوت تشيليه ولو فى بقعه كده ولا كده تجيبى ليفه وتدعكيها وتجيبى الجلانس وتلمعى زجاج الشبابيك كلها
تانى حاجه
انك قبل ما تكنسى تتني السجاد من الجمبين وتجيبى جردل المسح وتحطى فيه ميه وجنرال وبالمساحه الدوبار اللى هيا الشرشوبه تقومى تمسحى حوالين السجاد كويس